Denne veka har det vore ein del avisskriving om bibliotek og litteraturhus som konkurrentar/samarbeidspartnarar. Også nye aktivitetar og ny utforming av biblioteka er diskutert.

Det som eg ikkje har sett noko om er ting som den nye svartenesta som Opplysningen 1881 reklamerer så heftig for på TV. Her skal du kunne spørje om alt mulig, heile døgnet, og få svar etter nokre minutt. Det kostar “berre” kr.11,- dersom du får eit svar og kr.1,- dersom dei ikkje kan svare deg. Tenesta er open døgnet rundt.

Biblioteksvar tilbyr samme teneste gjennom si SMS-teneste. Den kostar ingenting for brukaren utover det ein sms uansett kostar, og det er samme prisen om dei kan svare deg eller ikkje. Dei lovar deg svar så snart som råd, og seinast i løpet av neste arbeidsdag. Tenesta er open kl.0900-1600 på kvardagar! Biblioteksvarchatten er open kl.1000-1400 på kvardagar og e-posten er faktisk open nårsomhelst, men svaret må ein gjerne vente på til neste arbeidsdag.

Biblioteksvar
Korleis kan vi forvente at folk vil bruke ei teneste som knapt er marknadsført og knapt open (ja, det er dyrt med reklame og lønningar)?
Folk gjer lekser, svarar på quiz, diskuterer diverse greier og lurar på masse rart også etter kl.1600 på dagen. Kven spør du då? Slik situasjonen er for tida så er det mykje større sjanse for at spørsmålet blir sendt til 1881 enn 1980.
Det gode med Biblioteksvar er at dei svarar på det meste unntatt medisinske diagnosar og juridiske spørsmål, og at dei seier ifrå at meir kompliserte spørsmål helst bør stillast via e-post eller chat, det same gjeld dersom ein vil ha skikkelege referansar til kor informasjonen er henta frå. Det eg syns er verst er at chatten som er mest veleigna til ein god dialog med brukaren også er den biten av tenesta som har minst opningstid.

Opplysningen 1881
Kva for opplæring i referansearbeid har dei tilsette?
Korleis kan eg stole på ei teneste som har som eksempelspørsmål “Hvor høy er Mont Blanc?” (Mont Blanc er eit fjell, fjell er inkjekjønn og er derfor “høyt”, ikkje “høy” – alvorleg talt altså!) og “Når stenger posten?” (Posten der eg bur, der eg tilfeldigvis er, der søstera mi som eg skal be om å gå på posten for meg er, i dag, i morgon, på laurdag?).
Det er og ganske masse 1881 ikkje vil ha befatning med – “Vi kan dessverre ikke svare på spørsmål vedrørende politikk, religion, sex eller annet som kan oppfattes som støtende eller krenkende.” Kven set grensa for krenkande? Svarar dei heller ikkje på spørsmål som “Står det noko om likelønn i FrP sitt partiprogram” (faktaspørsmål innan politikk) eller “Kor mange katolikkar finst det i verda” (faktaspørsmål innan religion), og vil anatomispørsmål vere krenkande?
Eg ser i dømet at 1881 oppgjer kjelde, men inkluderer det heile lenka eller berre eit namn som t.d. Wikipedia (kva for versjon av Wikipedia? Nynorsk, bokmål, engelsk, fransk…?)

Kven vil så eg bruke?
Truleg ingen av dei så lenge eg har tilgang til Internett.
- Kl.1601-0859 på kvardagar og døgnet rundt i helgene: 1881 dersom det hasta med svaret og det var viktig nok til å spandere 11,- kroner på det.
- Kl. 0900-1600 på ein kvardag vil eg bruke Biblioteksvar – dei er billegare, eg er nokså sikker på at dei som jobbar med det er så nokolunde kvalifiserte når det gjeld informasjonsinnhenting og eg er ein av dei som faktisk veit at dei eksisterer.